Иргэдэд Хөдөлмөр, нийгмийн хамгааллын салбарын үйл ажиллагааг  сурталчлах, хөдөлмөр эрхлэлт, халамж үйлчилгээ, нийгмийн даатгал, гэр бүл, хүүхэд залуучууд, хөдөлмөрийн аюулгүй байдал, мэргэжлийн боловсролын тухай хууль тогтоомж, эрх зүйн актуудыг тайлбарлан таниулах, нэг дороос үйлчилгээ үзүүлэх, салбарын хэмжээнд хэрэгжиж буй төсөл хөтөлбөрийн талаар дэлгэрэнгүй мэдээлэл өгөх зорилгоор Хөдөлмөр, нийгмийн хамгааллын яамны нээлттэй хаалганы өдөрлөгийг 2017 оны 06 дугаар сарын 19, 20-ны өдрүүдэд Сүхбаатарын талбайд зохион байгуулж байна.

Энэхүү өдөрлөгт Эрүүл мэнд нийгмийн даатгалын ерөнхий газар, төвийн зургаан дүүргийн Эрүүл мэнд, нийгмийн даатгалын хэлтэс оролцож байгаагаас гадна алслагдсан гурван дүүрэг болон 21 аймагт зэрэг зохион байгуулж буйгаараа онцлог юм.

Өдөрлөгийн үеэр элэгний С вирусын эсрэг Элэг бүтэн Монгол хөтөлбөрийн талаар, цалин тэтгэврийн зээлийн хүү буурч, шимтгэл тэглэсэн талаар, тэтгэврээ шимтгэл, хүүгүйгээр урьдчилан авах боломжтой болсон тухай, тэтгэврийн хяналтын аян, тэтгэвэр авагч банкаа сонгох болсон талаар гэхчилэн сүүлийн үед хэрэгжиж буй бодлого үйл ажиллагаатай холбоотой мэдээллүүдийг авахаас гадна нийгмийн даатгалын бусад үйлчилгээний талаар мэргэжилтнүүдээс зөвлөгөө авах боломжтой.

Мөн өдөрлөгт ЭМНДЕГ-ын хамтран ажиллагч түнш байгууллагууд, банк болон эмийн сангуудын төлөөлөл оролцож бүтээгдэхүүн үйлчилгээгээ танилцуулж байна. Даатгуулагч та бүхэн эдгээр өдрүүдэд 09:00-17:30 цагт хүрэлцэн очиж өөрт хэрэгтэй мэдээлэл, үйлчилгээгээ нэг дороос аваарай.