Нийгмийн даатгалын ерөнхий газар нь Монгол Улсын Засгийн Газрын 2016-2020 оны үйл ажиллагааны хөтөлбөрт тусгагдсан тэтгэврийн зээлийн хүүг үе шаттайгаар бууруулах зорилтыг хэрэгжүүлэн, тэтгэвэр авагчдад 6 хүртэлх сарын тэтгэвэртэй тэнцэх хэмжээний зээлийг 15 хувийн хүүтэй олгох ажлыг 2017 оны 01 дүгээр сарын 16-ны өдрөөс хэрэгжүүлснээр 2017 онд нийт 99163 тэтгэвэр авагч 79,3 тэрбум төгрөгийн зээлийг дээрх нөхцөлөөр авч, 1,3 тэрбум төгрөгийн зээлийн хүүгийн дарамтаас чөлөөлөгдсөн байна.
Улмаар 2018 оны 01 дүгээр сарын 16-ны өдөр нийт тэтгэвэр авагчдын 90 гаруй хувийн тэтгэврийг олгодог ХААН болон Төрийн банкуудтай Хамтран ажиллах гэрээ байгуулж, 12 сар хүртэлх тэтгэврийн 70%-тай тэнцэх хэмжээний зээлийн хүүг жилийн 12 хувь болгон бууруулсан ба өнөөдрийн байдлаар 10336 тэтгэвэр авагч 12,3 тэрбум төгрөгийн зээлийг хөнгөлөлттэй нөхцөлөөр авсан байна.
Нийгмийн даатгалын ерөнхий газар нь банкуудын хооронд шударга өрсөлдөөнийг бий болгох, тэтгэвэр авагчиддаа тэгш боломж олгох зорилгоор Голомт, Худалдаа хөгжил, Капитал, Капитрон, Улаанбаатар, Чингис хаан, Үндэсний хөрөнгө оруулалтын банкуудтай Хамтран ажиллах гэрээ байгуулж, 2018 оны 03 дугаар сарын 01-ний өдрөөс эхлэн нийт тэтгэвэр авагчид 12 сар хүртэлх тэтгэврийн 70%-тай тэнцэх хэмжээний зээлийг сарын 1.0 хувь, жилийн 12 хувийн хүүтэй авах боломжийг бүрдүүллээ.
Мөн тэтгэвэр авагчид өмнө нь тэтгэврээ 100% зээл болон зээлийн хүүд төлдөг байсан бол цаашид 70 хувийг төлж, 30 хувийг өөрт нь олгосноор сар бүр орлоготой байх боломжийг бүрдүүлж байгаа юм.
Өнөөдөр /2018.02.28/ дээрх банкуудын удирдлагуудыг Хөдөлмөр нийгмийн хамгааллын сайд С.Чинзориг хүлээн авч уулзан, хамтран ажиллах чиглэлээр харилцан тохиролцож, санал солилцсон бөгөөд банкуудын удирдлагууд Засгийн газрын хөтөлбөрийг бүрэн дэмжиж ажиллахаа энэ үеэр мэдэгдсэн юм.
НИЙГМИЙН ДААТГАЛЫН ЕРӨНХИЙ ГАЗАР
